محتوى يحترم عقلك

حواديت قبل النوم للأطفال بالعامية مكتوبة

حواديت قبل النوم للأطفال بالعامية مكتوبة نقدمها لكم اليوم عبر موقعنا زيادة حيث أنه يعاني الكثير من الأمهات والآباء في موضوع نوم أطفالهم، فعادة ما يقاوم الأطفال النوم رغبة في المزيد والمزيد من اللهو والمرح، وهو ما يرهق الآباء والأمهات التي تنتهي طاقتهم بنهاية اليوم، ومن الأمور التي يحبها الأطفال بشدة وتساعد الآباء والأمهات كثيرًا في مسألة نوم الأطفال، هي قصص قبل النوم.

حواديت قبل النوم للأطفال بالعامية مكتوبة

الحدوتة الأولى: الديب روكي

كان يا ما كان يا سعد يا إكرام، في قديم الزمان، كان فيه غابة عايش فيها الديب روكي، لكن روكي مكانش ليه ولا صاحب مع إن الحيوانات كلهم في الغابة كانت تعرفه، لكن يا ترى ليه مكانوش بيصاحبوه أبدًا؟

لأنهم يا حبايبي كانوا بيخافوا منه جدا ويهربوا لو جه ناحيتهم، وكان روكي كل ما يروح عند السناجب أو الأرانب عشان يسلم عليهم، يقوموا هربانين منه عشان مرعوبين، ومش بس الأرانب والسناجب لكن كمان كل الحيوانات اللي كانت عايشة في الغابة، ومكانوش أبدًا بيحبوا يقابلوه في أي مكان.

وفي يوم من الأيام كان روكي ماشي يقول لكل اللي في الغابة: ” صدقوني أنا مليش ذنب خالص، ولو كان بابايا وجدودي قبل كده اتعاملوا غلط معاكم فدي مش مشكلتي”، وكان ديما روكي يقولهم كده وعايزهم يصدقوه.

وكان في وسط الغابة، حيوان واحد بس هو اللي مصاحب روكي وهو التعلب فلفل، لكن فلفل كان بيتعامل وحش مع روكي وكان باين ديمًا انه عايز يخدعه، لكن لأن روكي كان علطول لوحده ومحدش بيكلمه، كان بيبقى مبسوط أوي لما فلفل يبقى جنبه.

وكان فلفل وروكي عندهم لعبة بيحبوها وبيلعبوها علطول، وهي إن كل واحد فيهم بيسأل صاحبه سؤال، وفي يوم كان فلفل عند روكي وبيلعبوا اللعبة دي، وسأل فلفل روكي سؤال واستناه كتير أوي عشان يجاوب، لكن روكي مجاوبش! وكانت المفاجأة إن روكي مش موجود أصلًا.

قعد فلفل يسأل نفسه يا ترى راح فين وقعد يدور عليه كتير أوي لحد ما لقاه، كان روكي قاعد على الأرض في مكان ومنزل راسه بين رجليه وباين عليه انه زعلان أوي!

سأله فلفل: ” مالك يا روكي؟، انت وقعت على دماغك؟ محتاج دكتور؟ ”

بصله روكي وقاله: ” دكتور! لا يا فلفل أنا مش تعبان خالص، لكن أنا زعلان عشان لوحدي”، زعل فلفل وقاله: ”  ازاي لوحدك واحنا صحاب؟ ولا انت مش شاي فاني كفاية!”.

قاله روكي: ” متزعلش يا صاحبي، كل الحكاية إنك مش معايا كل يوم، وأنا محتاج أصحاب يلعبوا معايا ويبقوا جنبي كل يوم”.

رد عليه فلفل: ” انت عارف.. أنا كمان لوحدي ومفيش حد عايش معايا، لكن أنا مش زعلان خالص بالعكس مبسوط، لكن لو انت يا روكي مش مبسوط ومحتاج أصحاب، ممكن تروح عند المزرعة، والحيوانات هناك هيصاحبوك وتعيش معاهم”، اتبسط روكي بنصيحة فلفل وقرر ينفذها وحس وقتها إنه مبسوط جدا.

ورد على فلفل: ” عندك حق يا فلفل يا صاحبي، أنا من بكرة بإذن الله هاخد هدومي وأروح أعيش مع حيوانات المزرعة”، فقاله فلفل: ” لما تروح المزرعة هتلاقي فيها حيوانات وفراخ حلوة وكبيرة، لما تعيش هناك ابقى قوللي أجيلك أقعد معاك شوية”، وقعد فلفل يضحك أوي، ومكانش روكي عارف هو قصده ايه ولا بيضحك ليه، بس مش مهم، المهم دلوقت انه مش هيبقى لوحده.

وفعلًا لما جه بكرة، ساب روكي بيته عشان يروح المزرعة، وكان طاير من الفرحة لدرجة انه رمى مفتاح بيته في المية!

وروكي رايح المزرعة مقابلش حد خالص، وعشان كده قال ان البيت اللي هيقابله هيدخله علطول، وفضل ماشي لحد ما لقى بيت كان قاعد فيه حصان صغير بيرتاح، ولما شاف روكي قعد يصرخ: “ساعدوني، ساعدوني، الديب هياكلني”، معرفش روكي يعمل حاجة وجري بسرعة.

ومشي شوية تانيين وقابله بيت تاني كانت جواه معزة، أول لما شافته دخل البيت قعدت تنادي: “ساعدوني، الديب اللي أكل أختي، هياكلني أنا كمان”!، وكل ما يمشي روكي ويقابل حد يلاقيه بيصرخ ومرعوب.

زعل روكي ومبقاش عارف هيعمل ايه، وراح قاعد في نص المزرعة، وشوية ولقى 5 فرخات بيقربوا منه، وسألوه: “فيه حاجة ضايعة منك؟”، قالهم: ” لا، لكن مش فاهم ليه بيحصل كده، مع ان التعلب صاحبي قاللي ان المزرعة جميلة وحيواناتها هتحبني”، وأول لما الفراخ سمعت اسم التعلب خافوا وهربوا وهما بيصرخوا: “ساعدونا! دا جاي من طريق التعلب”، وقام الديك بسرعة مدخل الفراخ جوه بيتهم وقفل عليهم، وكل حيوانات المزرعة خافوا وهربوا.

وقعد روكي مصدوم وزعلان جدا من اللي حصل، وكمان لقى الحيوانات جاية عايزة تمشيه من المزرعة، قام روكي قايلهم: ” أنا آسف! أنا بس كنت عايز أصحاب أعيش معاهم، وكنت فاكر انكوا هتحبوني، لكن كل ما أروح مكان الحيوانات تخاف مني وتبعد عني؟ ليه محدش بيحبني؟”.

زعلت حيوانات المزرعة بعد كلام روكي، وطلبوا منه يسامحهم عشان قابلوه بطريقة وحشة، وقام كلب المزرعة “ريكس” مقرب من روكي وقاله: ” أنا خلاص بقيت عجوز وتعبان، وعايز حد يحرس معايا المزرعة، ومتخافش الحراسة شغل سهل، ولو حبيت تساعدني، هعرفك تشتغل ازاي”.

فرح روكي أوي ووافق يشتغل مع ريكس، و كان روكي طيب أوي ومش بيقصر في شغله، وعشان كده صاحب المزرعة كان بيحبه وكان بيعتبره أحسن الحيوانات.

ومن وقتها بقا روكي هو حارس المزرعة اللي بتحبه كل الحيوانات.

ويمكن التعرف على المزيد من التفاصيل من خلال: علاج الخوف عند الاطفال بالأعشاب والزيوت الطبيعية

واطلع على المزيد من التفاصيل من خلال: قصص اطفال قبل النوم عمر سنتين وقصص أطفال خيالية

الحدوتة التانية: العنكبوت نونو

كان يا ما كان في قديم الزمان، العنكبوت نونو واقف يتفرج على العصافير فرحانة وبتلعب في بيتها، والأرنب وهو بيحفر بيت ليه ولأولاده.

فقال لنفسه: ” أنا كمان هبنيلي بيت أعيش فيه”، لكن معرفش يعمل بيت زي العصفور ولا جحر زي الأرنب، ووقتها زعل أوي.

وفي يوم قابل العنكبوت الحكيم اللي سأله عن سبب زعله، فقاله نونو: ” زعلان عشان مش عارف أبني بيت أقعد فيه مع مراتي وأطفالي”.

فضحك العنكبوت الحكيم، فاستغرب نونو وقاله ليه بتضحك، قاله: ” عشان العنكبوت مش بيعرف يبني بيت زي الحيوانات، وكمان يا نونو ياحبيبي البنت العنكبوتة هي اللي بتبني البيت مش الولد العنكبوت”، سأله العنكبوت نونو: “ايه اللي بتقوله دا ياحكيم؟”، قاله الحكيم: ” دي الحقيقة، لأن ربنا سبحانه وتعالى، خلق العنكبوتة البنت عندها 5 غدد حريرية في بطنها، والغدد دي اللي بتخليها تعرف تبني البيت اللي بيبقى على شكل شبكة عنكبوت، وبعدين تحط فيه البيض بتاعها اللي منه بيطلع عناكب تانية، والعنكبوتة تقدر تبيض لحد 150 بيضة، البيضة القوية تعيش وتطلع عنكبوت، والبيضة الضعيفة تموت”.

قاله نونو: ” يبقى كده لازم أتجوز بسرعة عشان تبني البيت”، ومشي نونو بسرعة قبل ما الحكيم يفهمه إن العنكبوتة هتموته، لأن العناكب بتموت بعضها، زي ما ربنا قالنا.

نرشح لك المزيد من التفاصيل من خلال: قصص اطفال قبل النوم باللغة العامية مكتوبة

وبهذا نكون قد وفرنا لكم حواديت قبل النوم للأطفال بالعامية مكتوبة وللتعرف على المزيد من المعلومات يمكنكم ترك تعليق أسفل المقال وسوف نقوم بالإجابة عليكم في الحال.

قد يعجبك أيضًا
التعليقات

لن يتم نشر عنوان بريدك الإلكتروني.

تعليق 1
  1. فرح يقول

    اين باقى الحدوته؟